Дэлхийн эрчим хүчний 2022 статистикийн тайланд дурдсанаар 2021 оны дэлхийн эрчим хүчний хэрэглээний 31 хувийг газрын тос, 26.9 хувийг нүүрс; 24.4 хувь нь байгалийн хий; 6.8 хувь нь ус; 4.3 хувь нь цөмийн эрчим хүч; 6.7 хувийг сэргээгдэх эрчим хүчний эх үүсвэрээр хангаж байна.
Нүүрсээр болон газрын тосоор үйлдвэрлэх цахилгаан эрчим хүчний хэмжээ зонхилсон хэвээр байгаа ч сүүлийн жилүүдэд үйлдвэрлэлийн бүтцэд үзүүлэх хувь хэмжээ тасралтгүй буурч 31% болон 27%-д хүрсэн байна. Байгалийн хийгээр үйлдвэрлэх эрчим хүчний хэмжээ аажмаар өсөж, 2011 оноос хойш 3.5%-ийн өсөлт үзүүлсэн. Сэргээгдэх эрчим хүчний хувьд мөн адил 13.5%-тай байгаа бөгөөд анх зөвхөн усан цахилгаан станц ашиглан үйлдвэрлэдэг байсан бол 2000 оноос хойш нар, салхины эрчим хүчний хөгжлөөс үүдэлтэйгээр энэхүү өсөлт нэмэгдэж байна. 1970-1980-аад онд цөмийн эрчим хүчний үйлдвэрлэл тогтмол өсөж, цахилгаан үйлдвэрлэлийн 17 орчим хувийг эзэлж байсан бол 2000-аад оноос хойш ойролцоогоор 15%-иар буурч 6.7% болжээ.
Зураг 3-т харуулсанчлан 2021 оны хувьд дэлхийн улс орнуудын зөвхөн чулуужсан түлшээр үйлдвэрлэсэн эрчим хүчний үйлдвэрлэлийн мэдээлэлд үндэслэн харвал чулуужсан түлшний үйлдвэрлэлийн хэмжээ 2010 онтой харьцангуй 4.3%-иар буурсан. (2010 онд 86.6%, 2021 онд 82.3% болж буурчээ).
Бүс нутгийн түвшинд эрчим хүчний хэрэглээний бүтцийг авч үзвэл нефтээр үйлдвэрлэх эрчим хүчний хэмжээгээрээ хамгийн өндөр буюу 43%-ийг Ойрхи Дорнодын бүс нутаг түүний дараагаар Өмнөд болон Төв Америкийн бүс нутаг 40%-тай байна. Харин CIS буюу Тусгаар улсуудын хамтын нөхөрлөлийн бүс нутаг нийт эрчим хүчний хэрэглээнийхээ 54% орчмыг байгалийн хийн үйлдвэрлэлээр, Ойрхи Дорнодын бүс нутаг 55%-ийг хангаж байна. Ингэснээрээ Ойрхи Дорнодын бүс нутаг нь нийт эрчим хүчний хэрэглээнийхээ 98%-ийг чулуужсан түлшээр үйлдвэрлэдэг гэсэн үг юм. Харин Азийн бүс нутаг нүүрсээр үйлдвэрлэх эрчим хүчний хэрэглээгээр хамгийн өндөр буюу 56%-ийг, нефтээр 26%-ийг үйлдвэрлэж байгаа бол сүүлийн жилүүдэд СЭХ-ний үйлдвэрлэлийн хэмжээ нэмэгдэж 11%-д хүрсэн байна. Европын холбооны улсуудыг хувьд эрчим хүчний эх үүсвэрийн төрөлжсөн байдал бусад бүс нутагтай харьцангуй жигд байдалтай байгаа нь харагдаж байна. Эрчим хүчний хэрэглээний 33%-ийг нефть, 24%-ийг байгалийн хий, 12%-ийг нүүрс, цөмийн эрчим хүчээр 9%, СЭХ-ээр 19%-ийг үйлдвэрлэж байна.
Сэргээгдэх эрчим хүчний эх үүсвэрийн хэмжээ хурдацтай өсч, чулуужсан түлшний хэрэглээг орлож байна. 2022 онд цөмийн эрчим хүч ашиглалтын хэмжээ 3%-иар буурч, сэргээгдэх эрчим хүчний үйлдвэрлэл 7%-иар нэмэгдэж, чулуужсан түлшээр ажилладаг станцуудын нийт үйлдвэрлэлийн хэмжээ 1%-иар буурах төлөвтэй байна. Нүүрсээр үйлдвэрлэх эрчим хүчний хэмжээ нь АНУ, Хятад зэрэг улсуудад буурч байгаа хэдий ч Европын өсөлттэй холбоотойгоор дэлхийн нийтийн хэмжээнд тэнцвэржиж байгаа бол хийгээр үйлдвэрлэх эрчим хүчний хэмжээ Европ болон Төв, Өмнөд Америкийн хэрэглээний бууралтаас шалтгаалан 2.6%-иар буурна гэж тооцож байна.
2022 оны хувьд дэлхий нийтийн цахилгаан эрчим хүчний хэрэглээний өсөлт 2021 онтой харьцангуй багасах төлөвтэй байна. Учир нь 2021 онд Ковид 19-ын хөл хорио суларч эдийн засаг хурдацтай сэргэсний нөлөөгөөр өсөлтийн хэмжээ 6% байсан бол 2022 оны эрчим хүчний эрэлтийн хэмжээг 2.4% байхаар таамаглаж байна. Энэ нь 2015-2019 онуудын дундаж өсөлтийн хэмжээтэй дүйцэж байгаа бөгөөд дэлхийн эдийн засгийн өсөлтийн удаашрал, ОХУ Украйн руу довтолсны дараах эрчим хүчний үнийн өсөлт, нийгмийн эрүүл мэндийн хязгаарлалтын шинэчлэл зэргээс үүдэлтэй юм.